折騰嘅睇樓任務終於完結，希望可盡快脫離呢間個廚房得嗰兩個爛鬼黐底易潔煲嘅酒店。
意佬話間屋我住多過佢住，所以俾我拍板揀樓喎。咁佢又冇錯啊，自從離開香港後我有時真係可以毒到三日不出閨門吐埋絲織個蛛網都仲可以。講起吐絲又諗起好想食花生醬奶油吐司，頂。
言歸正傳，我揀咗呢間露台有225度布市景嘅高層單位。係，我同你一樣睇到華畫聲，就算醫生叫你睇到幾開都一眼望唔哂。眼簾下有馬場，足球場，停車場，係冇商場，鏡頭右邊仲有一大堆綠油油公園，唔數了。
由3歲開始我就好鍾意望天打掛發白日夢，13歲開始再鍾意埋發吽哣，腦袋裏不停出現ZXAI “?”, 點解今日嘅我同琴日唔同？點解現實生活中冇禮服蒙面俠擔住支紅玫瑰去拯救我？今日我要做啲乜？聽日呢？做乜嘢要做嘢做嚟做乜嘢？
㢢家鷯中伏啦，跟佬走後遺症：以上及更多的「？」乘一萬次都冇人答到我。慶幸意佬俾好大空間我發揮自己嘅小天地，俾咗個藍天白雲佈景板我可繼續發吽哣。尤其嚟咗呢度之後又多一個”?”：揸咗筷子廿幾年，幾年前開始學煮意大利菜，依家唔喺意粉國咁要轉陣煮阿根廷菜，妖點煮啊大佬？？
多謝朋友仔嘅支持，最近情緒開始平伏落嚟，重新練習靜養打坐，希望快啲入伙等我可坐到腳都痺。以前望住自己同云云眾人，日日趕車趕飯趕收工，人生就為供車供仔供層樓。人只能活一次，咁樣糟質自己心靈好可悲，其實閒時放低部機打吓坐同每一天的自己溝通幾分鐘，了解更多自己究竟想要啲乜，第二朝起身你會發現身邊事物未必下下你諗得咁壞，目標其實唔係你想像之中咁遠。
有時都覺得意佬幾縱我，不過男人縱得起女人受得落，吹咩 ?
Search